東洋字不溜都係寫成直排嘅、即係「直書」「縱書」。漢字嘅基本結構都係由上而下、非直排嘅形式其實有啲違反咗漢字本身嘅設計。香港同台灣啲出版社到而家都仲幾堅嘅、即使「武」書多數印成咗橫排、不過「文」書仍然係直排多啲、又啱傳統又啱設計美學。噉點解我哋設網站却冚唪唥百份之九十九點九幾都用開橫排呢。
我第一次設網誌都經已係「網路２・０」時代、我諗住網上肯定有好多資源可以執返耒輕輕鬆鬆噉自己搞掂個直排網誌、點知幾乎乜都冇。我又冇乜嘢電腦背景、要自己整原始碼梗係搞唔掂嘅。最後搵到個 WP 主題叫做「VERTICK」、免費嘅、安裝之後個網誌就變成咗直排喇、不過有好多限制、比如標題唔好長過六七字、主題顏色又唔改得、外語又周時顯示唔到、難用得滯。〔不過、我仍然幾感謝設計提供 VERTICK 嘅先鋒。〕最後到今年有一次 WP 軟體更新、棄耕已久嘅 VERTICK 主題卒之跟唔埋時勢出咗局、唔用得。
噉點算呢！唔係幾識電腦嘅我、最後搵到咗三種方式耒解決。
第一係用ＣＳＳ自己整。我試過一陣、其實都搞掂咗一部份、即係文字都「掂」咗、可惜格式齊亂晒咗、自己又唔識整主題、最後都係失敗。
第二係直接加入使用艾比索。艾比索又靚又正、只不過係唔用得自己網域、又冇法「打包」下載自己啲文章留備份。前者我唔甘心、後者唔放心。如果你唔介意呢两單嘢、不如試吓艾比索先囉、又靚又正又免費。
第三係使用竹取度嘅 JAVASCRIPT 架罉。我唔係好識解譯、不如大家自己睇吓佢哋說明喇。我自己原底唔識整、好彩有個搞軟體嘅朋友出耒幫我手、之後就幾順利喇。依家我都識處理、如果你想整又唔識整、歡迎留言定私訊耒問我。
我要喺呢度同竹取啲工程大師講聲多謝！仲要同幫我手嘅台北工程師朋友講聲多謝晒！
最後我想鼓勵多啲人出耒建設使用直排網路平台。傳統啲嘢絕對唔係一定最好、但係我哋目前噉樣由直排換成橫排真係未經大腦薰陶。漢字本身內部嘅設計就係由上而下為主、理論上如果係要改成蒙古式滿洲式「上而下、左而右」嘅形式我都冇意見、但係寫成橫排點都會有衝突、唔會啱嘅。西洋史論文用開橫排我冇意見、科技相關工具書印成橫排都係冇計、但係我哋多數嘅網頁入面除咗漢字又係漢字、西洋字南洋字都未算多、繼續冇端端照版焗住喺度打橫排就點都係自我植民喇、你話係唔係先。