台湾人个智識愛以台湾做中心。咱愛瞭解咱東南西北个厝邊个歷史、地理佮生活。目前咱干焦上瞭解中國、閣來日本、若琉球佮菲律賓、「一片白茫茫」。
三不時聽人講東南亜移工个「母語」分四種：越南語、印尼語（一種馬來語）、泰語佮塔加洛語（又稱菲律賓語）。茲咁有影？問 GOOGLE 着知、印泰賓三國是正港个多語社會、足多移工个母語是爪哇語（印籍兮）、巽他語（印）、寮語（泰）、怡朗語（賓）、宿霧語（賓）云云。
只碼先講菲律賓。賓國「本土語言」有幾偌百種、吖「市場語」有成十種、不過有个真成（似）、會使「簡化」做五組。
「市場言語」着是逐所在「族際」个共通語。舉例、若一二〇冬前个美麗島、市場語有两種、台語佮客語。吖菲律賓佮台湾仝款、多數个語言不是市場言語、會曉个人攏無多、外口卡無機會通使用、吖多數个人个母語、嗎是市場語之一。
呂宋北部个市場語是伊洛戈語（ILOKO、ILOCANO）、着是地圖青色許搭、包含北爿離恆春百外公里个小島、伊洛戈語嗎是因个「第二語」。伊洛戈語通講是佮台語相隔壁。
紅色兮是塔加洛語、是菲律賓个國語、嗎是首都岷里拉（馬尼拉）多數个人个母語。
孔色（深藍色）兮是未獅耶語系、包含宿霧語・怡朗語云云、內部講話攏加減會通兮。
《台北星期天》許齣電影內面有一个主角是怡朗人、許工拄着一个嫁台湾翁个怡朗查某、因双方智覺着對方是怡朗人了後着改講怡朗話、不止仔親切、干焦許个台湾翁不知因是塊歡喜啥！
除去只五組市場語言、賓國閣有幾偌百種「小眾」个本土語言。小眾个本土語言佮文化系統、欲佇現代生存落去有影無簡單、政治佮經濟攏是問題。吖若「市場語言」、經濟个問題是無、不過愛解決政治个問題正會凍生存。伊洛戈語、宿霧語、怡朗語佮台語攏是只款情形。