舊年佇台南一間冊店看着只本《改變台湾》、糊塗糊塗共伊記做是基進个新一寫兮。頭一擺佮基進个新一見着面閣共伊講伊只本冊寫了真盞。伊問『叨一本。』講不是伊寫兮。囧
原來作者是楊新一。楊先个金門媽祖主張、有理閣有人性。金門媽祖不是台湾領土。台湾無許个權利通收金媽、嗎無許个義務愛收金媽。不過建國个時、愛乎金媽人差不多三冬个時間通好過台湾做台國人。
亦着是講、台國無收金門佮媽祖。不過金門佮媽祖个人頭三年會凍移民台湾做台湾人。在因選擇。
最近「華獨」只个用辞塊時行。所謂个「華獨」不是主張「中華獨立」、是主張「中華民國獨立」。不但安爾、因是主張「中華民國繼續佔台湾」。今因閣自稱「台獨」、因為因有欲「正名」做「台湾國」。不但欲佔台湾、閣欲「佔台獨」。
真多人塊問、到底「中華台北獨」佮「台獨」有省乜無仝。照我想、上要緊个爭差是後者有欲解破中華文化霸權、包括史觀。前者認為中華文化霸權無存在抑是無害。
但是夭有一項卡簡單个爭差、連洗腦洗上深个人嗎會「秒懂」、隨八。着是金門媽祖佮台國个關係。
台獨人士照講攏瞭解、金媽無屬佇台湾、嗎不八屬佇台湾。台湾無許个權利、嗎無許个義務、不通收金媽。不過照我个觀察、「中華台北獨」个人（中北獨、囧）攏認為金門媽祖只馬「是台湾个」、愛「留」。
所以若是有人講伊主張台湾獨立、閣主張愛「留」金門媽祖、若安爾咱不着看現現、伊是「中華台北獨」。會使問看伊个「國父」是省人、是蔣中正抑是中山樵。
㊟「媽」祖、「馬」祖。頂回看着日本時代个漢文課本、「馬公」寫「媽宮」。寫「媽宮」「媽祖」嗎卡合只兩个地名个原理。無定「馬公、馬祖」是中華政權个發明。