咱塊反殖民是不免先研究世間所有个殖民現象。咱若瞭解中華政權是塊殖民台灣、了後用思想佮行動來反殖、安爾正是重點。
總是咱若欲將台灣个殖民現象提去含世間个殖民現象比較、安爾咱着着愛加瞭解世間个殖民現象吖。咱若欲講『台灣人無國家、吖ＸＸ人有國家、有國家真正好』、咱着着愛先瞭解ＸＸ人个社會佮歷史到底是圓抑是扁。咱若欲講『今世間大概干焦伸台灣一个殖民地』、咱着着愛先瞭解全世界个社會佮歷史。
瞭解台灣个社會佮歷史着會凍拚台灣人个自由。不免先瞭解天骹下所有个事志。但是若是欲講起『世間大概干焦伸台灣⋯』許款話、着一定愛先瞭解世間四海个事志。咱若是凊凊彩彩準做世間別个殖民地攏已経自決甲好勢好勢、安爾雖似無害、總是對因無公平、亦拍損咱家己个論述个真實性。
舉例。若是港獨人士佮琉獨人士出來講、『逐家想看覓、今台灣都已経自決、有因家己个國家、吖咱是欲等何時。』茲是塊拍損因个論述个真實性、嗎是塊替中華台北政權鬥宣傳、咁不是。
結論。用別搭別族「虛構」个自由來佮被殖民个台灣製作對比、是無衛生兼無需要。瞭解台灣个事志着會凍鬥拚台灣个自由。海外个事志會使免插、嗎會使插。若是欲插、愛認真仔插。