衫送去洗、又閣是換一間試看覓。查昏去提、頭家娘共我算三萬、是一般價數个二倍。伊講是抵着逐工塊落雨、閣驚人客我隨卜來提、特別用機器烘、即着加收。論眞、貴淡薄我無省要緊、不閣乎人偏我不甘愿。看伊表情有許種輕鬆閣輕視塊「刣外國猪」个笑容、我着學越南婦人人、開聲一句續一句講正常價數外多到外多、講伊無理。伊凡世原底想講我袂曉越南語、有淡薄仔驚着、嗎是袂爽、講『好啦好啦、二萬。』我騎返來厝那塊想、越票三萬洗衫、卜是廣州都偷笑啊、「非第三世界」閣卡免講。我咁是對人箱計較。
不閣返來厝看着因治袋仔頂寫『THIÊN、TQ』〔天、中國〕、心內閣隨反感、想講加再無乎因加趁。只个「港都仔」中國外客多、別國个東亞人少（＝東亞外國人朗當做中國人）、了後華客閣歹癖顧人怨、了後舊年頂港閣有「台」塑事件⋯⋯。是港都仔卡排華、夭我卡排華？拍結。心情複雜。